|
Aggio no culo, che ssia beneditto,
che de notte e de juorno vò cantare,
non ha rrecietto, e sse sente crepare,
si pe disgrazia n'ora se sta zitto.
Io perché l'ammo, e no lo voglio affritto,
le donco lebertà, lo lasso fare,
benché da tutte nne sento parlare,
che ssia scrianzato, e ssia no guitto.
Ma te dà gusto, quanno sta de vena,
che mo canto de vascio, e de faozetto,
mo sotto voce, e mo co voce chiena.
Io pe dare a l'ammice cchiù diletto,
azzò ch'aggia la voce cchiù sserena,
ogne mmatina le dò no confietto.
|
