Za che a lèzzer, puttana, l'altra mia
T'ha parso de magnar una salata,
Te ho volesto mandar la replicata,
Perché ti no me venzi in cortesia.
Questa donca, mecanica, te sia
La tromba che te chiama a retirata,
E po s'ti nol farà, vecchia reffatta,
Senti quel che te annoncio: per la via,
Putti con torsi e pomi misiai,
Servitori e fachini col trar sassi,
Cridando in fina al cielo: Zola, dai!
Talché ti no porà far quatro passi
Che ti haverà d'ogni hora mille a lai
Che te cortezarà con detti arlassi.
Tien donca i occhi bassi,
Sta con le recchie attente a zò che digo,
E accetta sto partìo, che è d'amigo.
Per scapolar st'intrigo,
Sarra sù la bottega, e bello, bello,
Compra una careghetta e un molinello.
Fa dei soldi un livello
Con qualche spezier che sia contento,
Fin che ti sij varrìa de fuora e dentro,
Sustentarte d'onguento,
E de tutte le cose che bisogna,
Seben ghe intravegnisse onto da rogna.
E crédame carogna,
Che si no per sto mezzo quel pianetto
Che te cigna e manazza al Lazzaretto,
No puol mudar effetto,
Ma a sto muodo vedàndote varìa,
Bisognarà che 'l scambia fantasia,
Siché, lara fallìa,
Per sto primo consegio che te dago,
Ti porave lecar dove che cago.
Ma per far suso el spago,
Per ingemar a un le to caìe,
Vuoi cantar le to estreme ladrarìe,
Vuoi dir le strigherìe,
Che per buttar le fave e far incanti,
Ti metti a tutti quanti el pie davanti.
Maledetta dai Santi,
Nemiga delle messe e dei perdoni,
Amiga di ruffiani e di bertoni,
Sansuga da coioni,
Ruina de bancali e de sturuoli,
Fontana de panochie e de caruoli,
Doanna de pandoli,
Fòntego de posteme e porafighi,
Magazen pien de zòttoli e de intrighi,
Minera de calighi,
Letto da ponte, sponza da pettecchie,
Arnaso pien de flusso amorba secchie,
Mastello senza orecchie,
Tozza de mal francese, puttanazza,
Che te vegna una freve che te amazza,
Nave mandà alla mazza,
Fondachio de gianduse, marzumera,
Vergogna e vituperio de sta terra,
Cui senza tramezera,
Che, per quanto che intendo, l'è una salla
Che 'l marchesse ghe bàgola alla balla.
Lispia, fiappa e zalla,
Che se qualche barbier tolesse assonto
De volerte varir, ho fatto conto
Che ghe andarave in onto,
Lassando star le taste e i bollettini,
Mattina per mattina tre ciechini.
Reffugio de Bettini,
Lozamento de piatole e pedochi,
Che ti ha un carro de fango sui zenocchi.
Depenta a macchie i occhi,
Che chi te vede una xe in gran pensier
Se te sij donna, o pur lovo cervier.
Àlega, leamèr,
Che chi pestasse a un ogni to piaga,
(El) cavarave una nuova triaga.
Vis de Melissa maga,
Viso pi grando che no xe un taulazzo,
Viso che par el fondo d'un tinazzo,
Zeffo da dar solazzo
A grandi, a vecchi, a pìzzoli e mezzani,
Calamita che tira ai proprij danni,
Sansuga de malani,
Testa senza cavei, tempie pellae,
Fronte mal avalìo, zegie zontae,
Gràmole desdentae,
Bocca che rende un fià sì puzolente,
Che chi te stasse nome un credo arente
Roman a un filperdente,
Che fra la bocca e i pie ti puzzi tanto
Che xe un spasso e un solazzo un camposanto.
O viva per incanto,
Che chi te vede i puo(le) ben zurar
De veder una morta a caminar.
Ma perché vuoi rivar,
Perché vògio finir sto me disegno,
Che hora mai no ho testa de inzegno,
Fatti in qua, metto pegno
Che col spuzar da marza e da zerotto
Ti è sta causa che 'l tempo s'ha corrotto.
E zioghemo un sberlotto
Che s'ti va a star in villa quatro dì,
El tempo è conzo e che no piove pi. |
|
Oh, quante volte al dì son un lion!
Oh, quante volte al dì son un agnel!
Quante mi inalzo col pensier al ciel
E po me lasso andar zo a tombolon!
Oh, quante volte aniego la rason
E fazo l'appetito mio fradel!
Quante stago in amor puoco in cervel!
Quante possio saver mai quel che son!
Oh, quanto spesso bramo, e no so che,
E quel, co so che l'ho, nol vorìa haver,
E co ghe ne son privo ardo da sé!
Oh, quanto un sguardo sforza el mio voler!
Quanto el me empie de miel e de aloè!
Quanti travagi ha un puoco de piaser! |
Co ti fa profession de no voler
Esser vardà, né bramà dalla zente,
O tàgiate la testa, o crudelmente
Sepelìsite viva in monastier.
Perché tanto è possibile poder
Star con cusì bel viso continente,
Co' è ch'el levante deventa ponente,
E un spàrese un talpòn, o un salghèr.
Le brutte e desgratiae scampa i balconi,
E no le belle, e le tane e le grotte
Xe per serpenti, per tigre e leoni.
Ma, donne, co ti è sì lascive e giotte,
Diè star nome su amori e pettoloni,
Sul far de notte dì, de zorno notte.
|
|
Se no credesse un dì, vacca sfondrà,
De covèrzerte el cul co la cotala,
E farte de do camere una sala,
Credo che morirave desperà.
No porterìa sta sera el cazzo a ca'
E ziogherìa pi presto ancùo alla bala,
E sarà forza un dì che te la cala.
Basta, mo no ti te ne accorzerà.
Ti no ha paura infin che ti no 'l vedi,
E s'ti pensi mo ti che no 'l farò,
Vòlseme un puoco el cul, si ti no 'l credi.
Mo, s'ti morissi presto, e fotterò
All'hora quei che resterà to heriedi,
E co i so culi e me vendicherò.
|
Ve ressolverò mi sto dir, o potta,
Né le sia tra de nu a far rumor.
No l'havéu remetùa in t'un chiavor?
Mo remettila in mi c'ho chiavà in frotta.
Fotendo voi, fradei, (darghe) na botta.
Vedé, una man me dette tal saor
Che quanto a mi el me parse mior
Della bocca, del cul, de tette, o potta.
No se può ziogolar chi fotte in tette,
Po' quel del cul si xe un certo chiavar
Che dà alle volte quel che 'l no promette.
Chi fotte in potta perde 'l rasonar,
E sì ve soffeghé tra queste tette
E stè tre hore se volé sborar.
La bocca fa stentar
Perché vu no sentì se no sbrissae
A torno i denti che ve par palae.
Mi l'ho tutte provae,
E trovo che la man dà più trastullo
Che no fano le tette, potta, o culo.
|
|
|
|
|
<< Inizio < Prec. 1 2 Succ. > Fine >>
|
|
Pagina 1 di 2 |
